Dogana e Kosovës ka parandaluar dy raste kontrabande në pikën kufitare Jarinjë, duke penguar futjen ilegale të mallrave në territorin e Kosovës.

Në rastin e parë, gjatë kontrollit të detajuar të një automjeti të udhëtarëve me drejtues një shtetas serb, zyrtarët doganorë zbuluan dhe sekuestruan rreth 300 gram argjend të padeklaruar, i cili ishte fshehur për të shmangur detyrimet doganore dhe futjen e tij në tregun kosovar në mënyrë të paligjshme.

Në rastin e dytë, gjatë kontrollit të një automjeti tjetër, u gjetën dhe u konfiskuan sasi të konsiderueshme produktesh qumështi, të cilat po tentonin të kontrabandoheshin pa dokumentacionin e nevojshëm dhe në shkelje të rregullave për importin e produkteve me prejardhje shtazore.

Mallrat e sekuestruara janë duke u trajtuar sipas procedurave ligjore në bashkëpunim me institucionet kompetente.

“Dogana e Kosovës thekson se mbetet e përkushtuar në luftën kundër kontrabandës dhe në mbrojtjen e ekonomisë dhe shëndetit të qytetarëve, duke parandaluar hyrjen e mallrave të paligjshme dhe të rrezikshme në treg”, thuhet në njoftim./Arbresh.info